To Rosemounde: A Balade

Madame, ye ben of al beaute shryne

As fer as cercled is the mapamounde,

For as the cristal glorious ye shyne,

And lyke ruby ben your chekes rounde.

Therwith ye ben so mery and so jocounde

That at a revel whan that I see you daunce,

It is an oynement unto my wounde,

Thogh ye to me ne do no daliaunce.

For thogh I wepe of teres ful a tyne,

Yet may that wo myn herte nat confounde;

Your semy voys that ye so smal out twyne

Maketh my thoght in joy and blis habounde.

So curtaysly I go with love bounde

That to myself I sey in my penaunce,

"Suffyseth me to love you, Rosemounde,

Thogh ye to me ne do no daliaunce."

Nas neuer pyk walwed in galauntyne

As I in love am walwed and ywounde,

For which ful ofte I of myself devyne

That I am trew Tristam the secounde.

My love may not refreyde nor affounde,

I brenne ay in an amorous plesaunce.

Do what you lyst, I wyl your thral be founde,

Thogh ye to me ne do no daliaunce.